जनताले नदेखेको पूर्वराजा वीरेन्द्रको घर

कृपया पर्खनुहोस, भिडियो 60 सेकेण्डमा लोड हुदै छ

Loading...

नारायणहिटी राजदरबारभित्र एउटा सदनमा वर्षौं भइसक्यो ताल्चा लागेको। 

विभिन्न देवीदेवताका आकृतिले कुँदिएको त्यहाँको गेटभित्र टाइल (झिँगटी) ले छाएको एउटा तीनतले घर छ। रङ लगाइएको छैन, धेरै झ्याल सादा छन्, ढोका कुँदेर बनाइएका छन्। घरको अघिल्तिर दुबो उम्रिएको खुला चउर छ। घरसम्म पुग्ने बाटोको पिच उक्किन थालेका छन्। वरिपरि जंगल बढ्दै छ, पन्छाउने कोही छैन।  

कहिलेकाहीँ दुई जना कर्मचारी कुमारी राना र तारा मालाकार कुचो लगाउन आउँछन्। जालोसालो पन्छाउँछन्। यहाँको सम्भार भनेको यत्ति हो। र, पछिल्लो १२ वर्षदेखि यत्तिकै छ।

यो घर अरू कसैको होइन, पूर्वराजा वीरेन्द्र र रानी ऐश्वर्य बस्ने घर हो- श्री सदन। 

पूर्वराजा वीरेन्द्रको परिवार बस्ने श्री सदनभित्र नेपालको राजसंस्थासँग जोडिएका ऐतिहासिक पुरातात्विक वस्तु थोत्रिएर बसेको यहाँका कर्मचारी बताउँछन्। यो नारायणहिटी दरबार संग्रहालयकै क्षेत्रभित्र पर्छ, तर सर्वसाधारणका लागि खुला गरिएको छैन।

यहाँभित्र छिर्दा तत्कालीन राजपरिवारको जीवनशैली बुझ्न सकिन्छ। ‘राजामहाराजा चाहिँ ताराकै मान्छे होलान्, उनीहरू सुनचाँदीका थालमा भात खान्छन्, सुनचाँदीमै सुत्छन् भन्ने जनताको बुझाइ होला तर उनीहरूको जीवनशैली जान्न श्री सदन हेरे पुग्छ,’ नारायणहिटी दरबारमा तीन दशकदेखि कार्यरत तथा हाल संग्रहालयका प्रमुख रोहित ढुंगाना भन्छन्।